2014-05-10/11 VIGNEMALE - TURON NEOUVIELLE

GAVARNIE – PIQUE LONGUE DU VIGNEMALE (3.298 m.)

2014-05-10

Luz Saint Sauverren lo egin eta goizeko 5etan altxatu ondoren furgoneta hartu eta Gavarnira heldu ginen, eski estaziora doan bidea hartu eta berehala eskumara egin genuen Ossoueko bailarara sartzen den bidera. Bi kilometro egin ondoren, bidea itxita zegoen elur jausiegatik.

Furgoneta bertan itxi (1.480 m.) eta goizeko 7etan ibiltzen hasi ginen, Cesar zapatilekin eta botak fijazioetan lotuta eta besteok behetik eskietako botak jantzita genituela. 

Bailararen lehen zatia estua da eta elur jausi asko egoten dira. Elur jausi hauek, batzuk gainetik eta beste batzuk azpitik (sortzen zaizkien tuneletatik) pasatu genituen. 

Bidea moztuta elur jausiagatik bailara hasieran

Gero bailara zabaldu egiten da, bideak aldapa galtzen du eta asfaltoko bidea pista bat bihurtzen da.

Goizeko 8:30etan presara (1.800 m.) eta lautada handi batera heldu ginen, eta hemen elurra aurkitu genuen baina oraindik eskiak ez genituen jantzi, laster kendu behar zirelako. Lautada bukaeran ur jausi batek bailara ixten du, eta hau gainditzeko ezkerrera egin genuen (hegoaldera)  pala aldapatsu batetik eta ondoren trabesian eskumara, ur jausiaren gaineko bailarara heltzeko. Hemen eskiak jantzi genituen (2.000 m.) eta bailara honetatik gora eginez, Bayssellanceko aterpetik datorren bidearekin elkartu (2.250 m),  glaziarretik eta Petit Vignemale azpitik gora egin genuen “plateaura” heldu arte (3.000 m.).

Lautada honek, herradura forma du eta 8 bat  hiru mila metrotako mendik inguratzen dute; ezkerrean lehena Monferrat (3.219 m.) eta bukaeran , eskuman Vignemale. Bukaeran elurrik ez duenez, eskiak kendu eta azken 100 metroak harrietatik trepatuz egin genituen, eguerdiko 13:00etan gora helduz (6 ordu).

Lainoak sartzen zirenez, laster beherantz egin genuen. Hasieran elurra ona bazegoen, erdi aldean astuna aurkitu genuen, baina bukaeran berriz ere transformatua eta nahiko ona. Bi tramotan, elur faltagatik, eskiak kendu genituen eta oraingoan presaraino eskiatzen jaitsi ginen. Berriz, furgonetarainoko 5 kilometroak oinez eginez. Gainera, bukaeran, elur jausiko tunel batean goia jausita zegoenez, ez ginen ausartu bertatik pasatzera eta elur jausien albotik pasatu behar izan genuen. Azkenean, arratsaldeko 5:30etan heldu ginen furgonetara nekatuta, baina leku polit batekin disfrutatuta. 

 

10,5 ordu.   1.900 m. desnibel positiboa.   27 km

BAREGES – REF. LA GLERE – TOURON DE NEOUVIELLE

2014-05-11

La Glereko aterpetxea

Domekan be 5etan altxatu ginen Neouvielle aldera joateko. Eguraldia ez zen larunbatekoa, hala ere zerbait egitea pentsatu genuen. Furgonetan Bareges pasa eta bi kilometrotara eskumara doan bidea hartu genuen “Plateau du Lienz-era” . Pista hau gorantz jarraitu genuen, elurrak  mozten zuenerarte. Han furgoneta utzi (1.648 m.), bakarrik 50 metro eskiak porteatu eta gorantz hasi ginen fokeatzen, pista jarraituz, aldapa suabearekin. Ingurua zoragarria zela ematen zuen; hala ere, asko ez genuen ikusi, eguraldiak txarrera egin zuelako, lainoa sartuz eta xirimiria ere hasi zelako. Ordu eta laurdenera La Glereko aterpera (2.150 m.) heldu ginen. Aterpe hau gu egon ginen egun berean ixten zuten ekainaren erdi alderarte (zabalik otsailaren erdi aldetik maiatzera egon zen). Berriz, eskiak jantzi eta oso gutxi ikusten zen arren GPSari jarraituz, zerbait gora egitea erabaki genuen. Hasieran lakura jaitsi behar da eta ondoren beste lakuen bidea jarraituz, suabe-suabe gorantz. 2.250 metrotako altueran buelta egin genuen, eguraldiagatik eta Andonik fijazio bat apurtu zuelako. Hurrengo baterako gelditu zitzaigun Neouvielle aldea ezagutzea. 

Argazki guztiak ikusteko klikatu hemen