Elorrixo Mendi Eskia

Guk egin dugun ibilbideak, Pralognan herrian hasi eta amaituz, Vanoise-ko glaziarrari bira ematen dio. Ibilbide zirkularra da, bost egunetan egin duguna, eta Vanoise-ko parke naturalean kokatuta dago (Frantziako zaharrena).

Ibilbidean zehar hainbat glaziar txiki eta lepo zeharkatu ditugu, eta mendi hauek ere igo ditugu: Aiguille de Polset (3.531 m.), Dome de Polset (3.507 m.) eta Dome de Chasseforet (3.586 m.)

Hala ere, inguru hauek ibilbide ezberdin asko egiteko aukera eskaintzen dute, egunak luzatuz edo laburtuz, baita beste mendiko aterpe batzuk erabiliz ere.

Paisaia alpinoa, Arpon glaziarrean gora, Serac-aren albotik.

Datu teknikoak :

5 eguneko ibilbidea
Distantzia : 87 km
Desnibel positiboa : 6.785 m.
Ez du zailtasun teknikorik

Ibilbide hau egiteko informazioa, batez ere, Terueleko Grupo Alpino Javalambrekoen blogetik atera genuen (2.019ko apirilean egindako ibilbidea).

elrefugioalpino: ALTA RUTA PARQUE NACIONAL LA VANOISE 2019

Trackak beste talde batek 2.025eko martxoan egindako ibilbide beretik hartu genituen.

Horrez gain, ibilbidearen osotasuna eta nondik norakoak ondo ikusteko “Les Trois Vallées” mapa erabili dugu.

Apirilak 15a, eguaztena

Elorriotik goizeko 6etan irten eta, ordu erdiko bi geldialdi eginda, arratsaldeko 6etan heldu gara Pralognan la Vanoise herrira (1.430 m.).

Etxea "Appartament Chaulereux" oso ondo dago. Prezioa 96'5 € (Baditu izarak eta toallak)

Apirilak 16a, eguena

6:30ean jaiki, armosu legea etxean bertan egin, dena prestatu eta 8:20an hasi gara gorantz. Goizean laino apur batekin, baina gero dena argitzen joan da.

Herri irteeran eskiak jantzi ahal izan ditugu

Hasieran bailara itxia da eta hainbat elur-jauzi ikusi ditugu. Guk ibaiaren ezkerraldetik igo dugu, eguzkiak gutxien jotzen zuen mendi-hegaletik. Kontrako hegalean baino gutxiago, baina hemen ere neguan elur-jauziak egon dira

Elur-jausiak dena aurretik eraman zuen

Refuge le Repoju (1.711 m.)

2 ordu era erdira lehen geldiunea egin dugu zerbait jateko, Refuge du Roc la Peche parean (1.903 m.) Bertatik Dome de Polset mendiko ikuspegiak itzelak dira.

Refuge de Péclet Polset-era 13:30 aldera heldu gara. Guztira 5 ordu eta laurden behar izan ditugu 15 km eta 1.100 metroko desnibel positiboa egiteko.

Refuge de Péclet-Polset (2.474 m.)

Jende asko Pralognan-etik igo gabe heltzen da aterpera: Valthores-eko telesilla alpinoan igo eta gero Greboulazeko glaziarretik jaitsi eginda

Aterpea oso ondo dago, dutxa beroa hartu (dohainik), zerbait bazkaldu, mapak ikusi, trago bat hartu, billarren jolastu eta 7etan afaria.

Afaria, lo egin, armosua eta 500 cl-ko kaña: 64 € bakoitzarena (garagardoa 7'50 €).

Aterpeko leihotik sumatzen da hurrengo egunean zeharkatuko dugun Breche de la Croix de la Rue

Lehenengo eguneko tracka

Apirilak 17a, barikua

Goizeko 6etan armosua. 7:15ean gorantz abiatu gara.

Greboulaz glaziarretik gora Dome de Polset-eko lepora 10:15ean heldu gara. Igoera glaziarraren eskuma aldetik egin dugu, serac-en albotik.

Aiguille de Polset (3.531 m.)

Lepotik era alpinoan Aiguille de Polset-era igo dogu. Jaitsi, eskiak hartu eta Dome de Polset-era joan gara.

Itzulera Greboulaz-eko glaziar beretik egin dugu, baina oraingoan glaziarra zatitzen duen espoloi harritsuaren eskumako aldetik, pala eder eta errazak eskiatuz. Lac Blanc parean, zeharka joanda eta altuera galdu gabe, apur batean arraunean eginda, Peclet Polset-eko aterpera heldu gara 12etan.

Gauzak hartu zerbait jan eta eguneko azken zatiari ekin diogu

Gure aurretik zihoan hirukotea Croix de la Ruen gora

Beroaz igo dogu Brecha de la Croix de la Rue-ra (2.885 m.)

Cesar eta Aitor korridorean

Aitor Coix de la Rue-ra heltzen. Atzean Dome de Polset mendia

Aussois aterpera egin dugun jaitsiera

Jaitsiera eder bat eginda Fond d' Aussois aterpera heldu gara.

Guztira 8 ordu eta 45 minutu eman ditugu 20 km eta 1.700 m. positibo egiteko.

Cesar Fond d' Aussois aterpean (2.350 m.)

Aterpea oso ondo dago. Pentsio erdia eta 500 cl-ko kaña: 57 € bakoitzarena (garagardoa 7 €). Dutxa nahi izanez gero 2 €

Bigarren eguneko tracka

Apirilak 18a, zapatua

Goizeko 6etan armosua. 7:30ean abiatu gara kutxilak oinetan Col de Labby-rantz.

Heltzen gaudela, nahastu gara eski arrasto batzuk jarraituz eta beste lepo batera, Col du Maine-ra (3.330 m.) igo dogu. Kranpoiak jantzita lehenengo jaisi eta berriz gora eginez heldu gara Col de Labby-ra (3.324 m.).

Aitor eta Cesar Col de Labby-n

Beste aldera, Glaciar de la Mahure-tik jaitsiera ederra eta erraza. Disfrutatzekoa

Glacier de la Mahure

200 metroko azken igoera egiteko larruak janzten

Eguneko azken lepoan.

Azken jaitsiera egiteko bidea ezkerretik badoa ere ez du merezi hortik egitea; lautada batean arraunean joan behar delako. Hobe da harri espoloiaren eskumatik egitea, Arponteko lakuen gainetik. Gure tracka hortik dago markatuta.

Ordu biak aldera heldu gara Arpont-eko aterpera. Guztira 6 ordu eta erdi eman ditugu 16 km eta 1.480 metro positibo egiteko.

Arpont-eko aterpea mahai eta jarleku hauen azpian dago

Arpont-eko aterpea (2.310 m.)

Arponeko aterpe hau hotel bat da, estaldura telefonikoa ere badu. Ematen du partikularra dela. Zapatua izateko jende gutxi gaude, 17 bat lagun. Guardak esan digu uztailean, abuztuan eta irailean egunero beteta egoten dela (110 bat pertsona). Pentsio erdia eta kaña 75€ bakoitzena. Dutxa hartu nahi izanez gero 4€.

Hirugarren eguneko tracka

Apirilak 19a, domeka

Goiz ibiltzea erabaki dugu, arratsalderako aldaketa sartu daitekeelako eta glaziarrean ibili behar garelako. Beraz, goizeko 5etan armosua eskatu dogu. Armosu ederra egin eta dena antolatu ondoren 6:30ean abiatu gara.

Goizean aterpea, kanpotik ikusita

Cesar Arpont glaziarrean, aurrez aurre serac handi bat

Sokarekin elkarri lotzen

Gaur haizea eta lainoak sartzen dira, eta 3.000 metrotik gora laino itxia dago. GPSak markatutako ibilbidea jarraituz heldu gara Dome de Chasseforet mendira.

Cesar, Aitor eta Ruben Dome de Chasseforet-en (3.586 m.)

Haizea, lainoa eta hotz. 3.200 metroko altuerara jaitsi arte, ezer ikusi ezinik, GPSaren arrastoa jarraitu dugu. Hortik aurrera eguzkia eta lainoa tartekatuta.

Apur bat okertu eta, eskumara eginda, Pelve-ko glaziarrean beherantz egin dugu. Baina berehala, ia altuera galdu gabe, ezkerrera egin, larruak jantzi eta Col de Pelve-ra (3.200 m.) igotzeko 200 metro positiboak egin ditugu.

Col de Pelve-ra igotzeko larruak ipintzen

Aitor, Col de Pelve-rako bidean

GPSa jarraitu behar

Lainopean, ezer ikusi ezinik, GPSa jarraituz, larruak kendu gabe, Col du Dard-era heldu gara. Berez larrurik gabe eta azkarrago egiteko tokia da, baina laino artean ezer antzeman ezinik...

Argiune batean, Aitor eta Cesar Col du Dard-en

Hortik Col de Vanoise aterpera jaitsiera ona egin dugu. Azkenean 15 metro erremontatu behar dira aterpera heltzeko.

Cesar aterpe ondoan dagoen pasabidean

Col de Vanoise aterpea (2.520 m.)

Guztira 7 ordu eta erdi behar izan ditugu 19 km egiteko eta desnibel positiboa 1.785 m.

Aterpe hau ere, dutxarik izan ez arren, oso ondo dago. Pentsio osoa, bertan bazkaldu dugulako, 69 € pertsonako

Laugarren eguneko tracka

Apirilak 20a, astelehena

Gaur egin beharrekorako presa handirik ez genuenez, armosua 7etan egin dugu eta 8:30ean abiatu gara Col de la Grande Cassera (3.095 m.)

Col de Vanoise aterpea

Gezi gorriarekin, Glacier de la Réchasse-tik, atzoko azken jaitsiera

Col de la Grande Casse (3.095 m.)

10:30ean heldu gara. Lepora heltzeko azken pala aldapatsua, estua eta elur gogorrekoa da. Larruak kendu eta beste aldera egin ditugu 100 metro, Grande Casseko ipar pala, italiarren korredorea, ikusteko.